बुध्दी दे रघुनायका !!!

युक्ती नाहीं बुध्दी नाहीं | विद्या नाहीं विवंचिता ||
नेणता भक्त मी तुझा | बुद्धी दे रघुनायका ||१||

मन हे आवरेना कीं | वासना वावरे सदा ||
काल्पन धावते असीर | बुद्धी दे रघुनायका ||२||

अन्न नाहीं वस्त्र नाहीं | सौख्य नाहीं जनांमध्ये ||
आश्रयो पाहतां नाहीं | बुद्धी दे रघुनायका ||३||

बोलतां चालतां येना | कार्यभाग कळेचिना ||
बहुत पीडिलों लोकीं | बुद्धी दे रघुनायका ||४||

तुझा मी टोणपा जालों | कष्टलों बहुतांपरी ||
सौख्य तें पाहतां नाहीं | बुद्धी दे रघुनायका ||५||

नेटकें लिहितां येना | वाचितां चुकतों सदा ||
अर्थ तो सांगतां येना | बुद्धी दे रघुनायका ||६||

प्रसंग वेळ तर्केना | सुचेना दीर्घ सूचना ||
मैत्रिकी राखितां येना | बुद्धी दे रघुनायका ||७||

संसारी श्लाघ्यता नाहीं | सर्वहि लोक हांसती ||
वीसरू पडतो पोटीं | बुद्धी दे रघुनायका ||८||

चित्त दुश्चित होतां हे | ताळतंत्र कळेचिना |
आळसू लागला पाठीं | बुद्धी दे रघुनायका ||९||

कळेना स्फूर्ती होईना | आपदा लागली बहू ||
प्रत्यहीं पोट सोडीना | बुद्धी दे रघुनायका ||१०||

संसार नेटका नाहीं | उद्वेग वाटतो जीवीं ||
परमार्थ आकळेना कीं | बुद्धी दे रघुनायका ||११||

देईना पुरविना कोणी | उगेचि जन हांसती ||
लौकिक राखता येना | बुद्धी दे रघुनायका ||१२||

पिसुणे वाटती सर्वे | कोणीही मजला नसे ||
समर्था तूं दयासिंधु | बुद्धी दे रघुनायका ||१३||

उदास वाटतें जीवी | आतां जावें कुणीकडे ||
तूं भक्तवत्सला रामा | बुद्धी दे रघुनायका ||१४||

काया वाचा मनोभावें | तुझा मी म्हणवीतसें ||
हे लाज तुजला माझी | बुद्धी दे रघुनायका ||१५||

सोडवील्या देव कोटी | भूभार फेडिला बळें ||
भक्तांसि आश्रयो मोठा | बुद्धी दे रघुनायका ||१६||

भक्त उदंड तुम्हाला | आम्हांला कोण पूसतें ||
ब्रीद हें राखणें आधीं | बुद्धी दे रघुनायका ||१७||

उदंड ऐकली कीर्ती | पतीतपावना प्रभो ||
मी येक रंक निर्बुध्दी | बुद्धी दे रघुनायका ||१८||

आशा हे लागली मोठी | दयाळुवा दया करीं ||
आणिक नलगे कांहीं | बुद्धी दे रघुनायका ||१९||

रामदास म्हणे माझा | संसार तुज लागला ||
संशयो वाटतो पोटीं | बुद्धी दे रघुनायका ||२०||

जय जय रघुवीर समर्थ !!!